Tá maoiniú de thart ar €200,000 faighte ag Comhairle Cathrach agus Contae Luimnigh faoi THRIVE – Scéim Athbheochana Oidhreachta Lár an Bhaile – Cuid 1 do Cheantar Oileán an Rí i gCathair Luimnigh.
Tá THRIVE cómhaoinithe ag Ciste Forbraíochta Réigiúnaí na hEorpa (CFRE). Tabharfaidh maoiniú don tionscadal seo tacaíocht do na gníomhaíochtaí seo a leanas:
- Feabhas a chur ar an Straitéis Chomhtháite Uirbeach atá ann cheana féin – Creataí Bhaile Múrtha Oileán an Rí.
- Tionscadail a shainaithint a chuireann caomhnú agus athúsáid oiriúnaitheach ár stoc oidhreachta tógtha chun cinn agus a laghdaíonn folúntais agus tréigean i lár na mbailte ag an am céanna.
- Tograí tionscadail a chur in ord tosaíochta, a fhorbairt agus a shonrú chun píblíne a chruthú de thionscadail oidhreachta athchóirithe, nuamhaisithe agus athúsáidte go hoiriúnaitheach atá réidh le hinfheistíocht, rud a thabharfaidh ceann amháin acu chuig céim ullmhachta inar féidir é a chur san áireamh i gCuid 2 d'iarratas THRIVE.
Cuireann THRIVE cur chuige atá faoi stiúir an phobail agus dírithe ar an saoránach chun cinn maidir le pleanáil agus dearadh. Cuireann sé croíluachanna an Bauhaus Eorpach Nua san áireamh – inbhuanaitheacht, aeistéitic, agus ionchuimsiú.
Tá rannpháirtíocht saoránach/geallsealbhóirí ag croílár an tionscadail seo agus reáchtálfar roinnt imeachtaí rannpháirtíochta ildisciplíneacha agus seisiúin chomhdhearaidh sna míonna amach romhainn le cinntiú go mbeidh an tionscadal faoi stiúir an phobail agus dírithe ar an saoránach.
Tabharfaidh maoiniú THRIVE – Cuid 2 maoiniú idir €2m agus €7m d’údaráis áitiúla chun foirgnimh oidhreachta atá folamh agus tréigthe i lár a mbailte a athchóiriú, a nuamhaisiú agus a oiriúnú. Sainmhínítear foirgnimh oidhreachta faoin scéim mar struchtúir atá mar chuid den oidhreacht ailtireachta agus/nó Struchtúir atá faoi Chosaint nó Struchtúir a bheartaítear a bheith faoi Chosaint.
Chun tuilleadh eolais a fháil nó chun páirt a ghlacadh, cliceáil ar an nasc thíos: